據報道，廣州嘅所謂進口水果，其實大部分都係國產物，所謂“澳芒”，其實係海南四季芒；所謂“臺灣香水菠蘿”，其實係海南菠蘿；所謂“夏威夷木瓜”，其實產自海南；所謂“智利進口車厘子”，其實係山東產……呢啲國產水果，隨便貼啲英文標簽，就搖身變成進口高檔貨，價格也水漲船高，高出好幾倍。原本6元/個嘅海南四季芒，變身“澳芒”之后就變成咗48元/個！真係唔睇唔知道，一睇嚇一跳！

        我外號“水果大王”，自幼唔肯食飯唔肯食餸，就中意食水果，食厭咗國產水果，就經常嘆下進口貨，冇惗到食咗咁多年水果，今時今日先至知道原來自己俾呃咗，做咗咁耐嘅水魚。唉，我幼小嘅心靈，真係鬼死咁受傷！

        各位唔食進口水果嘅看官，唔好以為呢啲小事與你無關，其實成個城市嘅聲譽，多少都會受到影響。廣州係水果天堂，呢度嘅水果又靚又平又豐富，喺全國都係出咗名嘅，好多外地人到咗廣州，都會嘆下呢度嘅美味水果，仲會買啲返去做手信，睇呢篇報道之后，唔知佢哋會點惗呢？